Goobne Chicken (M88) (Closed)

今日去開中環，見前排都係打邊爐多，今日諗住食下韓國野無咁悶，一於就試下呢間之前一直想食既韓國餐廳！打開menu即刻點返個炸雞先啦，我地一行四人，先叫個UFO Fondue 芝士炸雞，可揀兩隻口味，就試下餐廳推介嘅芥末蜜糖同埋三重芝士，再點多個泡菜煎餅，魚片湯同埋韓式粉絲雞蛋卷。店員仲細心介紹只要注冊會員，non-alcohol drinks 買一送一， 咁著數就一於嗌多兩杯花茶飲下！講返食物先，泡菜煎餅煎得岩岩好，脆口得黎又唔會有焦味，泡菜唔會太辣，就算唔食得辣既我都無問題。韓式粉絲雞蛋卷裡面粉絲彈牙，配埋個醬汁都幾開胃，至於魚片湯就普普通通，不過都幾大碗幾多魚蛋。最後黎到期待以久既芝士炸雞，店員先細心幫我地將火鍋嘅三款芝士煮溶，我地已經急不及耐拎起炸雞點落去，芝士濃厚但都掩蓋唔到雞肉既嫩滑，油炸但唔油膩，食到欲罷不能。最後埋單free左兩杯飲品，慳左錢又可以食多餐！