一杯屋 (Closed)

同好姊妹好耐冇見，大家都話好耐冇出去行街，就下佢今日過海去銅鑼灣行吓，順便食飯聚一聚。兩個人最初都唔知去邊度食飯好，靈機一觸，上次唔係喺銅鑼灣食過間一杯屋幾好食嘅咩，而且環境都幾好，就趁今次再去幫襯。叫咗壽司拼盤，水準依然保持不變，今次另外叫咗個法國芥末籽醬牛柳定食，連埋前菜、餐湯同沙律都係百幾蚊，呢個地段算係幾抵食啦。牛柳煮得軟淋，加埋微辣而帶點酸嘅法式芥末醬，越食越開胃。再叫多個日式炒雜菜，炒得夠香，有我鍾意嘅菇菇同埋好多木魚絲喺面，郁嚟郁去好似不停叫你食佢咁~~食飽心情靚晒又可以同好姊妹繼續行街街！