夢の丼 (Closed)

朋友最近喺土瓜灣置業，我哋就喺附近嘅夢の丼食個晚飯。餐廳唔算好大，燈光柔和，所以都幾有日本居酒屋嘅感覺。我哋叫咗兩個丼飯，前菜係雜菜沙律，加有粟米，配上柚子醋，酸酸味味幾開胃。另外再有麵豉湯。首先我哋揀咗花錦魚生丼，配料包括有三文魚、白身魚、赤蝦、左口魚邊、金蟹子、三文魚子、櫻花蝦、蟹膏、豆腐、松葉蟹、蜆肉、玉子等，呢個價錢都做到咁足料，性價比真係高。另外就揀咗佢哋嘅招牌菜式夢の丼，配料包括帆立貝、牡丹蝦、海膽、燒三文魚蓉、松葉蟹、三文魚子、左口魚邊等。用料新鮮又高質。另外我哋仲揀選左一啲刺身同小食。店員推介我哋試石垣魚薄切，果然肉質彈牙，色澤晶瑩剔透，啖啖新鮮。黑鯥嘅油脂就更加豐富，味道鮮甜。慢煮鮑魚配肝醬用上慢煮嘅方法炮製，所以仍然保持鮑魚嘅口感，而醬汁就夠入味。蟹皇醬燒蟹膏豆腐味道就最驚喜，佢用嘅豆腐好滑好香，再放上蟹皇醬同蟹膏，然後再用火槍燒製而成。最後每人食一件左口魚邊壽司，最鍾意左口魚邊嘅口感，再掃上醬汁，味道就更佳。