六合小廚 (Closed)

放工約左朋友黎尖沙咀食飯，朋友諗黎諗去都唔知食咩，咁啱經過見到有人派傳單，見幾啱食又唔貴，就上左黎「六合小廚」。點左2人套餐$288，有兩餸兩飯兩湯。咖哩牛腩飯—牛腩炆得幾淋，咖哩汁唔會太稀或太澀，味道啱啱好。 黑松露炒四季豆—黑松露份量多，又煮得夠穫氣，使成碟餸既味道昇華到另一個層次。而四季豆炒得夠爽脆，黑松露完全能夠入味。好耐都冇食過咁好食既炒四季豆。隨2人餐所附上的時令蔬菜—芥蘭、中湯2碗、白飯2碗。擔心我朋友呢個大胃王唔夠食，另外單點「豆腐火腩煲」。可惜係火腩賣哂，經我地既同意後，廚師轉用斑腩，炮製了一道「豆腐斑腩煲」！係未食之前，都心諗臨時轉斑腩，應該都唔好得去邊。但品嚐過後，推翻左我地既假設，斑腩並沒有煮到太淋或爛，配上煲內既醬汁，並沒有使我們失望。