阿叔泰麵 (西菁街) (Closed)

慕名而來一嚐阿叔泰麵，位處元朗市中心外圍位置都有唔少人等位，就知佢係一間有實力嘅店，今日一試果真高質，師傅用心製作，成碗麵明顯係要花大量心機及嘗試方可到此水準，重每碗賣不到60蚊，真心係良心餐廳呢。門面好有地中海feel木門面，圓形招牌好好認。豬肉船麵 ($55) - 豬肉丸結實得嚟又彈牙，豬肉味濃無豬酥味，甜口嘅，面頭炸豬皮新鮮炸起酥脆得嚟唔死硬，浸湯後淋身吸湯同吃滋味倍增，豬肉片厚薄適中，一啲都唔靭重好掛湯添，配嘅金邊粉就濕潤咗啲，少咗煙靭，少少失色，湯頭不得了，係正宗泰式船麵果種鹹香味而帶甜嘅味道，湯底與餸菜好夾，特別係炸豬皮，好味。牛肉船麵($58) - 牛丸結實得嚟又彈牙，牛肉味濃，面頭炸豬皮新鮮炸起酥脆得唔死硬同樣浸湯後淋身吸湯同吃滋味倍增，牛腩好淋同入味，牛腩肉好甜，肥瘦適中，配河粉夾依個湯頭簡直係絶配，煙靭大片掛湯連芽菜、通菜、花生碎同吃絶品。但又講真如果你係食開或鐘意啲清淡食物嘅話，阿叔泰麵就未必會咁啱你喇，佢個湯頭係好濃味，好濃郁嘅。