月橋正宗越南湯粉

Open Now

Now Closed

對上一次去越南旅行已經係2019年嘅事。今日心血來潮想食返碗越南粉麵，懷緬一下係越南旅遊歡樂嘅時光。 太子附近雖然有好多餐廳，但原來越南餐廳五隻手指數得晒。咁就近近地試下呢間位於太子舊區入面嘅月橋。 餐廳唔算好大，得六張四人檯，不過午飯時間都唔算好多人。店舖係用QR code落單，而所有湯麵，撈檬，飯都可以加配野飲。 牛腩牛展湯河 ($58) 成碗粉都鋪滿左牛腩同牛展，餸嘅份量出乎意料地多。牛腩唔怕鞋口，牛展就非常出色，煮到好淋，有入口即溶感覺。而河粉底估唔到係用上越南河，好滑身。配上越南芽菜，成碗粉都好好食。 凍檸茶 (跟餐加$6) 凍檸茶就正常發揮，不過不失。 食物質素OK，份量都好大，下次午餐或下午茶可以再來。如果餐飲可以有熱奶茶選擇同埋凍奶茶可以擇甜度就更好。