蘇媽.蘇媽馬來西亞茶餐室 (Closed)

蘇媽蘇媽唔單止門面靚，入邊嘅裝修仲好有特色。一字骨肉骨茶要先飲咗個肉骨茶先，之後再食入邊嘅餸菜，記得要調校自己喜歡嘅醬油，之後再叫店員添返熱辣辣嘅肉骨茶，一字骨都算多嘅大概有四條，仲有豆腐卜，同埋金菇，肉骨茶嘅味道非常之濃，好飲。招牌砂煲老鼠粉，店員嚟到都提我地要趁熱攪拌，撈勻咗之後食，入邊嘅魚仔好鹹香，仲有老鼠粉好彈牙，撈埋一齊嘅口感係彈牙仲有魚仔嘅鮮味。馬來黑叉燒，叉燒半肥瘦，加上蜜糖嘅味道，真係難以抗拒，如果好怕肥肉嘅人可以選擇淨係食瘦嗰部份，不過我真係抗拒唔到，個腩肉係非常之油分豐富。馬來西亞串燒(6串)，串燒加埋沙嗲醬，簡直係好有馬來西亞嘅風味。甜品就點叫一個海南鴛鴦燒麵包，呢個麵包入邊有一塊厚厚嘅凍牛油，再配合埋熱辣辣烘咗嘅麵包，加上咖央醬，可以話係內冷外熱，仲要脆卜卜，真係減肥都要放埋一邊先。