花臣車仔麵 (Closed)

今年嘅母親節好特別，中菜、西餐、日本菜我哋都冇食，而我就帶咗媽咪去食好地道，好香港嘅「車仔麵」！今次嚟到位於旺角嘅「花臣車仔麵」，原來佢嘅花臣都幾多，淨係車仔麵配料都有超過50款，啱哂咁貪心嘅我！我一共叫咗15款配料，有柱候牛腩、豬軟骨、牛展、炸蝦餅、墨汁墨魚餅、日式叉燒、豬皮、腐皮墨魚條、魚皮餃、魚片頭、紫菜、芝心丸、咖哩魚蛋、玉子蛋、巨型蟹棒，再加腩汁！其中牛腩同豬軟骨真係好好食，牛腩好稔好入味；豬軟骨炆到軟硬適中，蝦餅同墨魚餅都好出色，前者入面有兩隻蝦仔；後者好煙韌，黑色好特別。豬皮好爽，又冇毛；個腐皮墨魚條炸到好脆口；魚皮餃食得出係四海做嘅；仲有個好特別嘅超長蟹棒，小朋友見到一定好開心呀！至於媽咪就叫咗11款配料，其中佢話牛孖根、牛肚同黑牛柏葉好正，牛根有嚼口；牛肚又稔又入味；牛柏葉好爽口，整體佢非常滿意！我哋仲一人叫咗一大支支裝可樂，爽呀！今年嘅母親節非常特別，有住香港人嘅集體回憶，同我未試過兩個人食車仔麵，食咗$327！媽咪，母親節快樂，多謝你，我愛你！