Lion Rock (Closed)

母親節訂咗一個四人餐，$3200幾有85折。首先，麻煩餐廳負責人ray幫我簽收送俾媽媽果紥花。嗌左兩杯鮮榨蘋果加雨衣甘藍果汁，另外整左兩杯cocktail ，一杯玫瑰加紹興酒，一杯檸檬汁溝其他酒，都係有啲乾冰出下煙咁，打卡影相ok。頭盤有燒味，叉燒，燒肉仲係暖既，燒肉個皮脆，叉燒軟稔，好味，海蜇燻蹄都OK。竹笙蟹肉薈燕窩，淡而無味，好似飲緊滾水，其中一碗有頭髮。雖然即刻替換，但已經有唔好嘅印象。龍蝦伊麵，龍蝦啲肉好爽，面都幾好食，依個算係唔錯，龍蝦應該係新鮮嘅。豉油雞，薑蓉夠碎好味，隻雞都幾入味，啲肉好滑，燒味真係做得唔錯。海星斑，魚肉鮮甜彈牙，好。鰻魚炒飯，個鰻魚汁好甜，好似食緊兒童餐咁樣，唔係好夾，我唔係太鍾意，啲飯又濕粒粒咁。鮑片遼參，海參好味，炆得好入味，鮑片冇咩特別，同罐頭嗰啲差唔多。本來果餐甜品係送桃膠，同餐廳傾過之後，轉咗做杏仁茶，暖暖地幾好飲，好香杏仁味。我唔係太鍾意壽包入面配紅豆，不過紅豆係軟林林嘅，紅豆蓉係OK，入面保留到一粒粒紅豆，但壽包我都係中意傳統既蛋黃加蓮蓉。服務好好，餐廳幫我驚喜出紮花俾媽媽，俾咗個開心回憶佢，係一個開心嘅母親節，值得同媽媽嚟㗎。