日熹樓 (Closed)

日熹樓出名在佢個百味菜宴，100樣餸盛惠4888，咁我就梗係食唔起啦，亦都唔夠人腳食，就咁食個晚飯小試牛刀先。醉雞不過不失啦，有酒味，雞肉夠實有咬口，雞皮唔肥，但係比起唐宮小聚嘅醉雞，尚有距離。四色小籠包係全晚水準最高嘅，有茴香，孜然，原味同埋唔記得咗四隻味，好食在於皮薄肉汁豐富餡料新鮮之外，呢啲茴香，孜然同埋唔記得咗唔會太過濃味，唔會喧賓奪主，值得一讚。至於冇鑊氣嘅清炒河蝦仁，其實係好新鮮彈牙，味道適中。睇落好似細細兜，其實份量亦都好夠，可惜身為一碟炒餸，佢係完全冇鑊氣。喺呢方面表現緊貼蝦仁嘅蔥爆羊肉，肉質其實亦都唔差，食落亦都頗為惹味，可惜亦都係完全冇鑊氣。最後碟炒年糕亦都有心爭奪全晚最冇鑊氣嘅寶座，本身上海年糕係有分現成切定同埋餐廳自己切兩款嘅，後者會彈牙啲立體啲好食啲，而呢度本來係屬於後者，但係好遺憾地喺全晚最冇鑊氣比賽入面三碟參賽者係打和啦super。