興記菜館

Open Now

Now Closed

去廟街食煲仔飯，唔係去四季就係興記，呢兩大山脈已經霸佔咗廟街煲仔飯多年，咁究竟邊間好食啲呢？之前已經寫過四季食評，而家就講吓興記啦！興記响廟街有好多間分店，基本上總有一間唔駛排隊嘅！即叫即食真爽 興記响煲仔飯款式方面可以話係花多眼亂！除咗典型嘅臘味飯、鳳爪排骨、窩蛋牛肉、北菇滑雞外，亦豉椒白鱔、薑蔥蟹、咖哩牛腩、餐肉煎蛋飯…… 基本上同碟頭飯無異，只係唔用碟用煲仔上枱啫！至於食物質素方面，我點咗排骨飯，啲排骨係肉排，唔似四季咁只有骨冇肉。而飯量亦比四季多，但可能火喉唔夠啦！所以成個煲仔飯都冇飯焦嘅！另一個臘腸滑雞飯，臘腸係下等貨，唔香仲超硬 但係啲雞就真係幾滑嘅而且仲幾多肉o添 廟街另一皇牌 - 蠔餅，佢有別於四季嘅炸蠔餅。興記嘅蠔餅偏向蠔仔煎蛋，質感偏軟比較飽肚，而蠔仔份量就唔係咁多喇！食熱辣辣嘅煲仔飯＋蠔餅，最好梗係配埋可樂啦！興記有自家汽水櫃，飲汽水唔駛走出街買，而重點係興記有支裝可樂！煲仔飯 ＋ 蠔餅 ＋ 大支裝可樂，一站式齊晒！此乃興記生存之道！