孖寶去骨海南雞 (又新街)

Open Now

Now Closed

幾年前朋友介紹話呢間餐廳的口水鷄飯同海南鷄飯都好正，我同老公試過之後時不時都會再嚟幫襯，今次我就叫左個大嘅口水鷄飯配油飯($52)外加凍奶茶(加$4)。送嘅紅蘿蔔粟米南瓜鷄腳湯依然精彩，飲落南瓜味香甜濃郁，用料足，呢度嘅例湯都算係我幫襯過嘅食市之中數一數二。口水鷄飯賣相好吸引，見到鷄皮同鷄肉之間有透明啫喱狀嘅膠原蛋白就知D鷄肉有幾嫩滑。個醬汁食落酸酸辣辣仲有好香口嘅乾蔥味，加埋鷄肉下面爽口嘅芽菜，真係好開胃好好送飯。今餐仲留意到侍應身上嘅圍裙大大隻字寫住不含味精，證明真係用料充足，用心烹調。幾年嚟多次幫襯水準依然，值得一讚！