池記 (Closed)

有時清清地想食麵或者粥，我一定會揀池記。貪佢服務好、坐得舒服、質素有保證，價錢亦都唔貴！叫咗個及第粥、炸雞翼，同炸鯪魚球。池記嘅粥係最我食過最綿，而且有米香，每一款粥都會有少少唔同味。今次呢款豬潤好大塊，口感非常清爽處理得好好。豬肉丸係手打，非常之滑嘅質地，細細粒好彈牙，有豬肉嘅鮮甜，好味！豬肚爽口彈牙，味道唔算太濃，但口感一流！炸雞翼大推呀！係我食過炸得最脆嘅雞翼，連埋上面超足料嘅炸蒜，每一啖都係卜卜聲。雞翼比較大隻，炸到外脆內軟，仲會咬到啲肉汁。有時口痕我都會專登過嚟食啲炸雞翼😆炸鯪魚球，識食一定係食蜆介😏 呢一間嘅蜆介酒味比較濃，鯪魚球炸得香脆可口，食到鯪魚嘅清香同鮮甜。配粥食另有一番滋味。銅鑼灣呢間老店比較細間，坐得唔舒服，下次想食可以食其他分店。