砵砵車仔麵 (Closed)

難得去元朗，當然要周圍揾下美食，但當日唔係太肚餓，所以諗住食碗麵就算，呢頭就俾我見到間好似係新開張嘅車仔麵，裝潢簡單，勝在夠企理整潔，就呢間啦！雖然我只係食一般車仔麵餸，但個湯底鮮甜到不得了，而且好濃，好有細個時食嗰啲車仔麵感覺，豬腸係用我最喜歡的細腸，好腍，而且非常入味，洗得又夠乾淨，非常滿意。豬皮都好入味軟腍，食落覺得好有膠質，唔錯，但個豬紅就唔係一夾就散嗰隻，同行朋友話一夾就散嗰啲豬紅先至唔靚，周星星喺食神都咁講，但我就真係鍾意夾得散嗰隻豬紅囉，口味嘅嘢，佢識條鐵咩值得一提係個辣醬，100%自家製，辣到飛起，老闆娘早已經提過我，但愈辣愈過癮，食到殊殊聲，所以叫咗杯金桔蜜，奇怪嘞，唔多甜嘅，原來桌面早已有支糖水，鍾意幾甜就自己加到夠為止，原來我平時飲嘢都飲得幾甜，呢個方法幾有驚剔作用總括而言，呢間車仔麵值得再去，因為感覺得到呢度嘅出品好細心同有誠意，味道又真係幾ok嘅