甜記餃子

Open Now

Now Closed

雙拼湯餃十隻（$48）湯底揀咗蕃茄薯仔湯，味道不錯，酸酸甜甜，碗正中間有一pat蕃茄薯仔蓉。椰菜冬菇雲耳豬肉餃，餃子正常size，餃子皮厚薄適中，滑溜，有咬口。餃子餡飽滿，豬肉餡唔算多，反而椰菜冬菇雲耳佔多啲，所以口感較清爽。香芹芫荽豬肉餃，西芹味濃，芫荽味亦足，口感同樣清爽。雙拼煎餃十隻（$52）本來要咗白菜豬肉餃+韭菜豬肉餃，點知我嗰份比錯咗隔離枱，而隔離枱嗰份十隻都係韭菜餃，但因為已經等咗半個鐘以上，所以唔等了，要咗呢十隻韭菜豬肉煎餃。餃子皮香口，但摺疊位就硬咗少少，餃子餡同樣飽滿，大量韭菜，味濃。食食吓，員工送上五隻煎餃作補償，話係白菜豬肉餃。但咬開，其實係椰菜冬菇雲耳豬肉餃，well，多咗五隻食，唔可以要求咁多。個人覺得，湯餃好食過煎餃。