鮨政 (Closed)

鮨政完全係黃竹坑打工仔嘅超級救星，呢到簡直係餐廳沙漠，好難先可以搵到間高質又抵食嘅日本餐廳。Lunch Time好多人等位，由於餐廳比較細，建議最好打電話訂枱先。近排因為疫情，多左外賣服務，俾大家有多個選擇。午市提供唔同套餐，一個係每日供應Menu，一個係Daily精選Menu，仲有午市Omakase壽司揀 (不過由於lunch時間唔夠，一直無試過)。今次一個人食，坐Bar枱，可以望住兩位師傅準備食材，好有日本feel。北海道魚生定食($128加一)除左魚生飯，定食仲包括沙律、一碗烏冬同茶碗蒸。沙律用左柚子醋，酸酸地好開胃。刺身包括海膽、三文魚、甜蝦、蟹籽。刺身切得很厚，非常新鮮而且肥美。海膽充滿海水味，紫蘇葉包住甜蝦一齊食，別有一番風味。手打烏冬煙韌彈牙，落埋七味粉，Perfect! 日式蒸蛋好滑，入面有菇、雞肉等，夠足料，個調味岩岩好。成個定食嘅份量好足，一定食到飽。雖然同區黎講算比較貴，但店員嘅服務態度非常好，同埋非常用心製作食物，用料足，選料亦都好高質，強烈推介!