美心西餅 (Closed)

舊老細請食團年飯，小肥雖只屬前部下，但亦有份參與其中。碰巧主人家生日將近，多年來o既得力助手C姐誠意送上蛋糕為其暖壽 。為咗要俾多個機會XO仔寫食評，蛋糕款式就交由細佬揸fit。記得舊老細最愛食芒果，所以就喺美心揀咗個勁好意頭o既「黃金祝福」芒果蛋糕 。「黃金祝福」最細都要兩磅重，啱哂團年飯依啲大party。兩磅單售$356，另加每磅$20可有朱古力脆米層，因有美心會員卡可享八折優惠，合共即$316.8，連價錢都又「生」又「發」，掂呀 ！「黃金祝福」兩層蛋糕同樣鬆軟，朱古力脆米層又夠卜卜脆，可惜芒果過酸 ，未合波士心意。幸好C姐帶埋愛孫比卡超一齊食飯，見到小朋友食到lam lam脷，大家望住佢都不停讚佢好「孫」，好「孫」，搶盡波士風頭 。