屯門小曼谷泰國美食

Open Now

Now Closed

母親節前夕，諗住避開唔去人多商場，點知麒麟徑亦一堆人潮，7點，乸住張要等十張枱嘅飛，落住豆大嘅雨仲要冒住涼風，等咗廿分鐘頂唔順就貪就手……寧寧舍舍呢間舖冇客，諗住冇咁蹺伏味搵到嚟。入去行經地板、掂圓凳面、洗筷子均覺黐立立……得個笑笑眼嘅靚女看舖，本身打完波又太餓，二話不說，都係點一堆嘢……可能見有老有嫩一口氣叫咁多餸咁豪氣，送兩杯龍眼冰過我哋飲，外賣杯裝，着實口渴，唔死甜有龍眼肉味，300ml左右好快啜風。柚子沙律係幾多柚子肉，不過唔似金柚，勉強交到差。串燒雞牛豬完全冇炭燒嗰陣味，冇滲油感，似用微波爐整熟。最費解係點解淋上去啲醬係腐乳溝花生醬咁味？怪爆感頓生。豬頸肉問題類近，冇燒香質感，靠配送嗰個辣汁打救番。食涯以嚟最難食嘅濕炒牛河出爐，芥蘭、蔥都冇條，牛冇該有嘅味，汁底、河粉味似碗布……4人食咗兩小碗，面面相覷之下留番八成俾枱面，連催眠自己用點豬頸肉啲辣汁倒落去整走陣怪味都冇意欲。比較正常味道係馬拉盞炒通菜。生菜包似搵水灼熟，冇鑊氣。