小火山 (Closed)

📍銅鑼灣 小火山香港呢幾日天氣咁凍，最正梗係約朋友去打個邊爐。港式邊爐相信好多人都食過，但係泰式邊爐就真係冇食過。見到時代廣場附近有呢一間泰式邊爐，地方好就腳，有朋友就最啱。٩(˃̶͈̀௰˂̶͈́)و餐廳係主打泰式邊爐加烤肉，所以每一台都會有一個烤爐同埋邊爐，個邊爐有兩邊，可以揀兩種湯底。我哋今日就揀咗好骨湯同椰汁雞湯。湯底非常之濃郁，浸唔同嘅肉類落去都能夠吸收到濃濃嘅味道，非常之入味。我哋今次就嗌咗個二人餐，分別有泰式豬肉、牛肉同豬膶。肉類嘅份量都好足夠，我哋兩個人食完啱啱好，不過就建議如果比較大食嘅朋友，可能要嗌多少少配菜。除咗肉類之外，仲有一碟原隻魷魚。店員已經好貼心咁樣將魷魚切成可食用嘅大細，非常方便。而喺食用嘅方法方面，店員就建議我哋先將食物浸落去啲湯度，過咗一陣先拎上去烤，咁就可以令到啲肉汁可以鎖住，但係同時間都會香口。而而喺青木瓜沙律方面，份量非常之足夠，而且調味都好地道嘅泰式口味，不過對於唔係好食得辣嘅我，如果唔小心咬到辣椒，就真係有啲辣😂但係對於食得辣嘅朋友，應該絕對冇問題。🤫