鳴虎 (北帝街) (Closed)

最近日本宣佈重新開關，緊係去食下拉麵準備下先！呢間拉麵店係土瓜灣有2間分店，當日就去左北帝街分店食。鋪頭主要提供四款口味，全部都以豚骨湯為基底，再加上其他味道。而不同期間都會推出特別日味。當日嗌左黑嗚虎（黑蒜油）及嗚海老（味噌蝦）拉麵。黑嗚虎以黑蒜油調味，黑蒜油十分香，豚骨湯飲落厚身而唔死咸，拉麵用上細麵，因為湯底濃厚所以亦十分掛湯。叉燒上菜前灸燒過，將叉燒既油脂燒出十分香口。一碗拉麵亦附上一隻溏心蛋，兩塊灸燒過既叉燒，紫菜等，配料足夠。嗚海老為蝦味噌豚骨湯拉麵，湯底蝦味突出，飲落鮮味配上豚骨湯亦很夾。可是，因為加左味噌關係有小小重口味，食到後面有小小咸。 當日亦加錢嗌左份叉燒同餃子小食，小食叉燒為豬肩肉，食落比拉麵叉燒瘦小小，另外餃子為菜肉餡，唔夠喉既朋友可以考慮點。