泰國人海南雞 (弼街) (Closed)

前排個朋友俾左張$50飲食優惠券我, 但一直都冇用到....今日出到太子, 見到依間店, 諗起仲有張券未用, 就走去問吓仲用唔用得 (因為都袋左一段時間, 都袋到爛爛哋...)佢話用得~就拎飛等位, 等左陣就有位, 仲係側面的二人枱, 唔洗迫住坐, 跟住就點餐喇~點了海南雞飯同手撕雞波菜麵, 仲加多杯青蘋果梳打, 好快就黎左個湯, 好香, 都幾好味, 好濃的雞味, 之後就到海南雞, 都唔錯, 冇碎骨, 雞肉夠嫩, 點左甜甜酸酸的醬汁更加惹味, 係隻雞翼頭仲紅紅哋, 有少少不良感覺, 不過雞翼入面冇紅色, 都OK~至於個飯唔會太硬同太油, 都算適中, 略厭個飯唔夠香~之後就係手撕雞波菜麵, 第一眼覺得似"撈撈冷麵", 不過雞肉都幾大舊, 依個都唔錯, 幾好味~最後就到青蘋果梳打...味道怪怪哋...飲唔到青蘋果味, 個底仲有啫喱, 仲有粒唔知係咩黎嘅果肉, 好酸....因為用左$50優惠券, 埋單都係$67, 依個價錢絕對抵, 其實正常五十幾蚊一個餐, 平時都好少食...