緣味小聚 (93WYS)

Open Now

Now Closed

上次試咗蒸海鮮放題，今次海鮮定量、火鍋放題餐，兩者差不多價錢，都係約$400一位，一於比較下邊款抵食啲。兩者最大嘅分別係上次食嘅海鮮放題餐，海鮮係可以無限任點嘅，但款式就比較少。今次嘅海鮮定量餐，只嚟一轉，但就有龍蝦、鮑魚、帶子呢三款任食冇嘅海鮮，而任食餐就會多咗蟶子仔。龍蝦並非平價嘅波士頓龍蝦，而係真龍蝦，超級新鮮彈牙勁多肉，頭仲有啲膏，不過呢度就冇提供鉗畀你拆殼，所以頭位一啲鬼鼠肉就食唔到。另外上次任食餐可以點任點蒜蓉蒸法國生蠔，定量餐就冇嘅。而點心方面，上次任食餐可以點蝦餃燒賣小籠包等，反而今次定量餐選擇就少好多，只有啲包類同甜糕，所以今次完全冇點到點心。任食火鍋嘅料就完全一樣，牛肉依然好好味，澳洲M5牛今次嘅質素好過上次。自助飲品亦都一樣。我自己係比較鍾意定量餐，因為如果任食餐要加龍蝦要加98蚊一隻，對於食量唔大但好似我咁想食多啲款嘅人，定量餐應該係更好嘅選擇。但如果你好大食，特別鍾意食蝦蜆蠔，仲有蝦餃燒賣，我就覺得就海鮮任食餐比較適合你。另外買咗50蚊當150蚊洗嘅openrice餐飲券, 用完之後計埋醬料費同加一，人均$338。