新南苑私房菜火鍋鷄煲 (華僑商業中心) (Moved) New Location

又想食海鮮又想食雞煲應該點算好？今日呢新南苑食個late lunch, 午市海鮮餐$169一位任食雞煲, 可以滿足曬兩個要求！先嚟雞煲揀咗小辣, 用三黃雞肉質厚身嫩滑, 脂肪少, 啖啖肉好滿足！一定要加埋油炸鬼, 煲一煲軟綿綿, 醮滿麻辣醬汁, 香口惹味, 真係食到停唔到口！食完雞煲食火鍋就打邊爐, 揀咗南瓜花甲湯底。好多花甲幾清甜唔上火啱曬我！海鮮拼盤有虎蝦、蟶子、鮑魚、台山蠔、脆鯇片和龍躉片。虎蝦好大隻爽口彈牙有蝦膏。鮑魚仲識郁好新鮮。龍躉片鮮甜有魚味！除咗海鮮, 仲有本地牛頸脊和小籠包。牛頸脊鮮嫩有嚼口牛味濃郁。用小籠包嚟打邊爐又幾得意, 一口咬落去軟綿綿, 湯汁四溢！蔬菜、小食就去自助區自己攞, 除咗火鍋配料任點任食, 梗係仲有汽水任飲, 有三個大雪櫃款式都幾多。最後食埋個360牛乳奶凍, 甜甜地有好濃沃嘅奶味, 為呢一餐劃上完美嘅句號。