龍德樓 (Closed)

老細將煎蛋牛肉飯和金針雲耳蒸雞飯(個名大約記得，有錯莫怪> <)擺落張枱到，除咗個煲外形幾靚之外，睇落其實冇乜特別。我跟手將枱上支鼓油，係咁意放少少落個煲到，希望夠味啲。女友平時夜晚好少食咁多飯，都扒咗幾碗，我諗住叫佢，雖然要俾錢，都唔駛chur到咁盡架嘛，跟住見佢都係咁扒，可能餓掛，咁我都費事得佢清晒，咪開動。一食，我都呆咗下，鼓油唔過鹹、唔過甜，最緊要既，就係帶少少酒味，將薑絲啲辣味都中和晒，唔單只咁，連雞油都滲入晒啲飯到，恰恰好，唔似海南雞飯咁得個油字，熱力足夠到，連個煲有一絲裂紋，如果係啲邊位，我都會諗佢懶，唔換好啲生財工具；但條裂紋係個煲底，上枱個陣仲熱既，咁姐係話個師傳成日用大火，keep住個煲既温度，仲要唔係短時間，起碼都大半年，日日咁做先會有紋。埋單個陣，我找少兩蚊，好味既嘢，唔一定要揾米豬蓮，用心既，其實總會有人知道。