Project B (Closed)

Happy Wednesday收工同咗姐妹去深水埗揾食，見到有間西式cafe & bar叫Project B，除咗有室內座位，仲有部分户外位置，感覺都幾chill！黑松露軟殼蟹手打牛肉漢堡（$108）餡料豐富，即炸軟殼蟹好香脆，牛肉都煎得好好，外面焦香入面半熟，配埋蕃茄、酸瓜、半融芝士同黑松露醬，值得一提嘅係麵包特別用咗黑糖麥包，食落少少甜味，好特別！加拿大豬鞍配蜜糖芥末籽汁（$178）好有誠意！豬鞍好厚肉，煎到軟腍又juicy，蜜糖芥末籽汁幾清新解膩，配菜有經典波浪薯條同烤雜菜。墨西哥焗雞肉卷(2pcs) （$48）個人超推薦呢款雞肉卷，內餡有雞肉、洋蔥、芝士，熱辣辣嘅焗雞卷上面有蕃茄莎莎醬、牛油果醬同沙律醬，味道層次好豐富，送酒一流！自家製窩夫拼鮮果雪糕（$78）現烤熱窩夫加上士多啤梨、藍莓同芒果雪糕，最後淋上朱古力醬，窩夫外香脆內鬆軟，淡淡蛋奶香配上雪糕同忌廉，每一啖都好滿足。另外見到有精選二人餐都幾抵食，三百蚊唔洗，有湯、主菜、意粉/飯同飲品，下次經過可以再黎食！