茶湯會 (皇后大道中) (Closed)

炎炎夏日三十幾度，咁岩經過茶湯會又口渴，當然想整返杯凍野醒一醒神，降下溫消下暑啦近年珍珠奶茶風氣流行，自己都飲過唔少舖頭既珍珠奶茶，都開始想停一停試下第二款既飲品。起舖頭揀左好耐都未決定到揀咩，最後就問店員，佢介紹左百香果蘆薈綠，咁就試一試啦。等左五分鐘左右，杯飲品終於到喇，超口渴既我當然即刻大啖大啖咁飲，百香果同綠茶既配搭相當清新，平時飲開微甜既我今次都係照舊微甜，飲落去有少少百香果既酸味，個種酸係有種開胃既感覺，再配合綠茶就更加突顯到呢杯飲品既特色–消暑解渴！台式飲品黎講，當然仲有另一個主角，就係蘆薈粒，蘆薈粒既甜味加埋百香果既酸味起口中合拍到不得了，個種酸酸甜甜既開胃感覺令到即使飲左大半杯都仲起唔會覺得滯，而且蘆薈粒亦相當足料，即使飲到底都仲有唔少蘆薈粒剩，所以真係強烈推薦百香果綠茶！