XOXO Café Lab (Closed)

呢間新Cafe開咗都有一段時間，行過都會比佢嘅裝修吸引到。舖仔細細，開放式嘅設計充滿田園風格，以藍白色為主，大量木類嘅架仔以及假花感覺清新，亦顯心思。我哋揀咗五個午餐，包餐湯及蒜茸包，味道唔錯。另外嘅小驚喜係惠顧午餐嘅蛋包飯以及意粉類會送Haagen-das脆皮三文治一份。餐湯有薯仔碎，蒜茸包真係好脆，用嚟點湯食一流。北海道牛乳蛋包飯嘅餸有六款揀，豬扒，漢堡，雞扒，魚，牛柳粒以及雜菜，點都會有款啱啩。我哋揀咗牛柳粒同豬扒。蛋滑嘟嘟，牛肝菌汁亦好好味，唔會太鹹，牛柳就中規中矩，豬扒炸得好脆身，肉質亦鬆軟。鮮茄肉醬意大利麵，茄味夠濃，唔會太多醬，啱啱好，中間嘅蛋感覺唔到有同無嘅分別，不過整體好味。鮮南瓜忌廉煙肉意大利麵，食唔出有南瓜忌廉味，普普通通。蒜片牛柳粒意大利麵，部份牛柳粒好韌，而味道唔突出。每人一份嘅haagen-das雪糕。