漁舍酸菜魚 (Closed)

門面裝修唔錯，地址亦都好容易搵到。周圍交通便利。曾經有一瞬間覺得旁邊嘅牛牛火鍋店就係屬於呢間餐廳。因為見過有啲人喺呢間餐廳度打邊爐，但係個爐竟然係牛牛火鍋店拎出嚟。實在令我大吃一驚。再睇真少少，原來係兩個名。呢間餐廳就專門食酸菜魚，不過佢亦都有做煲仔飯同埋火鍋。今次就選擇咗食煲仔飯，因為今日實在太凍啦。煲仔飯係一個暖笠笠嘅選擇。咁我就點選左金銀蒜開邊蝦煲仔飯，再加多碟單骨雞翼。飲品要另加，所以我都有諗過食完飯再出去飲其他嘢。但12:57落咗單，13:47先有飯😵‍💫，所以都冇乜心情飲嘢。中間都試過三四次催單，但係每次得到嘅回覆都係話整緊。等到個人既熱情都冷卻咗。其實個煲仔飯拎咗上嚟揭開蓋都幾香，但係六隻蝦有啲有剝殼，有啲就冇剝殼。蒜香味唔算太重，係食完之後過咗一排，先會覺得個蒜味喺個口腔度停留咗好耐。趁熱淋上豉油去食，係豉油香最重最好食嘅時間。炸既單骨雞翼配上泰式酸辣醬。味道就好似麥當勞嘅雞翼餐，咁呢度就唔詳細講啦。整體食完埋單都超過$100，因為佢有+1服務費。