品粵居

Open Now

Now Closed

今日去咗灣仔帶父母去食中菜未入去已經好古色古香，上到去有落地玻璃可以睇到灣仔嘅風景，居高臨下視野廣闊，感覺非常舒適。座位之間都有距離，傾偈唔會嘈親隔離。店員服務非常友善，亦都不停幫我哋加水。茶壺採用玻璃壺，下面仲有個爐熱住d茶, 令到茶keep住熱嘅溫度。仲有一個壺比你用來加熱水入去玻璃壺，自己去決定去浸泡茶葉嘅時間。好耐冇食過海星斑，而且同父母一齊食飯，都要照顧好佢哋嘅身體，所以叫星斑兩味就最適合啦。碧綠炒球非常健康嘅一道菜色，好多西蘭花，仲有紅椒黃椒去令成道菜色彩繽紛。未食已經流晒口水。 魚肉非常厚身、而且好多件，好足料。仲加入陳皮絲去辟走魚嘅腥味。古法炆頭腩用砂鍋上菜，未食已經聽到吱吱渣渣聲，非常夠熱。裏面超多薑蔥，魚腩非常鮮甜肥美，店員仲幫我哋撈勻，先開始食。豉椒涼瓜炒安格斯牛肉食得出牛肉片真係安格斯嘅味道，非常嫩口，脂肪比例均勻唔會過肥、亦唔會好韌。涼瓜炒到完全冇晒苦澀味，食落回甘，涼瓜片切到好薄片、口感非常爽脆。好耐未食過咁好味嘅涼瓜牛肉，而且好夠熱同好夠鑊氣。