人生有限杯.串燒店

Open Now

Now Closed

最近登龍街開咗間新店，主打多款特色串燒，當中加入唔少港式Fusion料理，而且最平$10就有交易！店內座位唔多，晚上到訪一定要預先留位，用餐時間兩小時，食物即叫即燒，份量適中，適合約朋友仔上嚟吹水啤一啤🍻肉類款色眾多，大蔥雞肉大塊啖啖肉、雞中翼燒至外脆內嫩、松阪豬同五花腩肉油脂感滿滿，肉味突出，令人一試難忘、雞腳筋比較少見，帶咬口，灑滿調味粉十分惹味，值得一試。仲有燒翠玉瓜、蒜蓉菜脯燒茄子同蜜糖燒菠蘿，食返啲菜降低油膩感。另外私心推介豚肉卷，鹹香口味，裡面包住唔同餡料，有車厘茄、荔枝、麻薯、鵪鶉蛋、黑松露金菇等，可以按個人喜好選擇，車厘茄同荔枝咬落爆汁且十分開胃、麻薯QQ哋、鵪鶉蛋蛋味出、金菇帶絲絲口感，性價比高。小食有老油條釀墨魚滑爆芝士，四小粒，炸至外脆，淡淡芝士香氣，點埋蜜糖好好食。主食方面大大力推介咖喱牛舌菠蘿包，外皮超脆超甜，牛舌厚切但入口即化，配埋煎蛋真係不得之了。香蔥手抓餅都唔錯，四大片，熱辣辣，外層夠薄，香蔥又香又鹹，食埋就啱啱好夠飽。