篤篤車 (Moved) New Location

去完元朗公共圖書館見肚餓就喺附近揾嘢食。經過見到呢間餐廳有泰國鱷魚湯底車仔麵咁得意就入去試下。舖仔細細，大概坐十幾二十人，感覺都幾舒服。我同友人都係揀自由配搭嘅三餸餐($38)，我要微麻辣嘅泰國鱷魚湯底，米線底配🐷大腸、豬紅、牛筋。友人就叫左微麻辣牛腩湯底，粗麵配🐷大腸、豬紅同墨魚丸。我哋另外各叫左一份小食，泰酥炸鷄翼(細)($15) 同 泰式鳳爪(細)($15)；飲凍奶茶同凍咖啡(跟餐每杯$7)。鱷魚湯底鮮味濃郁，奶白色嘅湯底本身已經有杞子、紅棗同蟹味菇做配料，豬大腸大腸味濃，炆得夠腍夠入味，有四夠大大嚿嘅牛筋，牛筋亦炆得夠腍、豬血爽口有豬紅味，成碗米線都唔錯，值得一讚👍朋友牛腩湯底粗麵亦不俗，豬大腸、豬紅同樣出色，墨丸大大粒爽口彈牙，唔錯！泰酥炸鷄翼，外皮香酢脆，入面鷄肉juicy，食落夠味我就無點個酸辣醬嚟食。泰式鳳爪，約有5件鳳爪，口感爽口，酸酸辣辣好醒胃。凍咖啡、凍奶茶，茶記水準，不俗！總括嚟講，呢度食物好味，整體感覺乾淨舒服，係一間用心經營嘅小店！