極尚大喜屋 (加連威老道) (Closed)

全家人除左我，都超級鍾意食日本野。特別係呀媽，食親壽司刺身就笑騎騎，不過作為一家之煮，呀媽其實好慳家，平時逐碟計錢，佢就會就住我地荷包唔捨得叫。今次就趁佢生日，同家姐一齊請佢食放題，等佢開開心心食到夠本為止。大喜屋其實都食過幾次，刺身質素真係好穩定，夠新鮮又夠凍，擺盤都好靚，見得下人。款式超級多，我諗有超過一百樣野食，要寫真係寫唔完，就寫下特別有印象既野食啦。呀媽同家姐至愛就係帶子刺身，厚肉又鮮味，原隻既蝦刺身好甜又大隻，家姐話出面賣好貴，三文魚俾既部位都好靚好肥美。雖然我唔係超鐘意食刺身但都好多野啱食，例如燒和牛，甜甜地，好嫩好正仲有炸物芝麻雞翼脆口又惹味，每次黎都必食，呀爸呀媽超鐘意炸榴槤波波，有爆漿既感覺。雖然唔係話平，一個人都成3百蚊，但係佢既食物質素同款式選擇，的確係值回票價，一次過滿足哂成家人既日本胃口。