江南瀨粉 (福榮街) (Closed)

講起瀨粉，大家都應該唔會陌生，成世人點都食過下。坊間好似冇乜餐廳主打瀨粉，今次就介紹下尼間打正旗號賣瀨粉嘅餐廳。平時嘅粉麵店，座位都比較擠逼。尼間餐廳就相反，座位好闊落，坐得舒服。舖面光猛，再配合簡約嘅裝修，比一般粉麵店少一份焗促嘅感覺。食物選擇好多，好難揀！唯有揀樣最多餸嘅大大碗鮮製瀨粉，咁就樣樣都可以試到😂再加左碟唔係間間粉麵店有嘅白灼鵝腸同酥炸雞翼。上菜速度一般，可能係同鮮製瀨粉有關？🤔大大碗鮮製瀨粉真係大大碗，兩個人食都綽綽有餘！入面包羅萬有，有肥牛、水餃，豬潤等等。其中我對豬潤、魚皮餃同豬肉嘅印象比較深刻。魚皮餃味道鮮美，外皮有咬口，餡料豐富。豬肉用上豬腩肉，餣得入味。豬潤厚身，入口滑溜，冇腥味。坊間好味嘅豬潤買少見少，喺尼度食到真係幸運！酥炸雞翼上枱熱辣辣！外皮炸得酥脆，內裏仲有肉汁，要小心辣咀！白灼鵝腸就有少少令人失望...份量唔算多，當小食就還好嘅。鵝腸夠厚身，夠爽口，可惜油脂唔夠豐富，冇鵝膻味，嚴格尼講係淡味得滯。好彩附上嘅葱油好惹味，一齊食就比較好啲。整體尼講，尼間餐廳係水準之上，可以一試！