御老鍋台式火鍋 (Closed)

以前成日都覺得打邊爐係夜晚活動，間唔中見到人地下午茶打邊爐，都覺得好好奇，打完都唔駛食晚飯啦，但係人大左用諗法都唔同，下午茶打邊爐都幾好，食飽左夜晚可以食小啲，咁就可以當減肥。今日陪朋友去尖沙咀睇波鞋，朋友上網搵左依間喺君怡酒店裡面嘅火鍋店，就決定同朋友黎試一試。職員首先會遞上調味料俾我地自己調味。餐廳提供八款特色湯底，我地揀左御前膠原蛋白美人鍋。呢個湯底好豐富，有紅棗，桃膠，烏雞，淮山等等，首先我地飲一碗湯，湯底清徹，不過味道非常濃郁，真材實料。職員會隨即加湯俾我地打邊爐。西班牙極品黑豚肉眼卷：黑豚肉肉味鮮甜，口感柔軟，而且唔鞋。繁魚花膠筒：花膠大大隻，唔會好似平時打邊爐啲花膠仔放左入湯底就唔見左，花膠有四件，骨膠原豐富，而且口感煙韌有彈性，很高質。新竹魚蛋：魚蛋非常彈牙，而且大大粒。手拍小青瓜：辣味好香，青瓜好新鮮，好爽口，食落口非常開胃。迷你黑雲耳：黑雲耳份量好多，而且好爽口。山水滑豆腐：豆腐非常滑，而且豆味濃郁。水耕BB生菜苗：食火鍋必定會點菜，生菜苗很新鮮，吸收左湯汁更加滋味。呢度火鍋店湯底真材實料，職員服務態度好，下午茶嚟打邊爐真係唔錯。