羅麥記 (Closed)

呢間羅麥記同家下已經泛濫嘅冰室一樣，主打懷舊，但睇得出佢都花過下心思喺裝修，有6-70年代feel，不過最緊要都係食物質素！招牌羅麥汁牛河，即係瑞士汁牛河。我嗌咗多汁，但上菜嗰時好明顯見到啲河粉係乾嘅，於是叫佢另上兜汁，好彩個汁都算有味，正常瑞士汁，所以炒河味道係合格，同埋唔係用幼身河粉，食落都有咬口。但係炒得略嫌唔夠火候，鬆肉粉牛肉牛味欠奉，不過未至於係浮屍十日嘅牛。窩蛋雞肉焗飯就麻麻地，普通白汁得個鹹，個飯炒底但濕笠笠咁，雞件係滑嘅，但冇乜調味，隻蛋嚟到嗰時已經穿咗，賣相一般。茶走還好，雖然都係有落到花奶，但煉奶嘅甜度適中，奶味都冇搶哂茶味，有返茶餐廳應有水平。考慮埋價錢，佢又冇收加一，相對其他銅鑼灣茶餐廳物價嚟講唔算貴，整體嚟講，嗌中佢嘅拿手菜，都食得下嘅。