鉄板200 (Closed)

與久未露面的朋友吃晚飯，地點由他選擇。沙田新城市廣場，裝修後真是喚然一新。印象中，裝修後只去過一次美心皇宮和Fish & Co.，今次朋友揀了Teppan。預左要等位，等8張位又唔算多，所以都沒有再去嘗試找其他地方，在商場行個圈便回來等吃。怎料，回來時已過了很多張檯。幸好知客都好識做咁立即安排座位，抵讚。朋友喜歡食三文魚，先點一客三文魚刺身。再看過餐牌，選了一個奄列雞絲炒麵和一個特制咖喱炒飯。兩個人原本應該唔夠食，但小弟剛巧有點不舒服，沒什胃口。三個餸食住先。三文魚刺身，有五片，算是肥美鮮甜。奄列炒麵賣相唔錯，奄列包著炒麵、雞肉絲、紅蘿蔔絲和生菜絲咁。麵唔夠熱，亦欠口感，但就幾重薑汁味。奄列如可煎耐多一點點時間，相信會更美味香口。特制咖喱炒飯我並不喜歡。飯是用珍珠米炒成，而非一般的泰國米，但效果麻麻。咖喱唔辣，也不夠香。豬肉碎撈飯亦欠缺了應有的口感。食物算一般，服務要加分。以咁既價錢，可入再選擇範圍之列。