皇廷工房點心專門店 (Closed)

約左朋友黎皇廷飲個下午茶，兩點左右黎到，過左lunch hour唔多人，一黎就有枱。朋友未到，睇下食咩先，原來有午市套餐，一個主食配一個點心，仲有奶茶咖啡送都係五十幾蚊，抵喎。除左午餐，仲有下午茶餐，菠蘿油薯條個啲，嘩嘩，比預期中多野食呢。最後決定叫幾個點心飲下茶傾下偈，先上呢個燒汁釀尖椒，上枱時幾香喎，尖椒一隻辣兩隻唔辣，個人鍾意食辣，不過呢啲都係抽獎黎，哈哈。上面係墨魚滑，好彈牙，加埋甜豉油好好味呢。再黎有蒜蓉蝦春卷，個個都鍾意香口野嘛。外皮好脆，內餡超熱，好香蒜蓉味，啖啖蝦膠正喎。以下蒸點一次過到，即叫即蒸嘛。先食籠皇廷蝦餃皇，蝦超爽，大大粒好飽滿。松露野菌餃如其名呢，好香菌味，食落鮮味回香，正喎。鵪鶉蛋燒賣又係正，下面的肉好鮮味，蛋綿綿的。仲有豉汁蒸鳳爪，呢個有啲失望，一黎唔夠汁，二黎鳳爪未夠淋又未入味，扣分。最後係甜品香滑薑汁糕，好滑又夠薑，正。順便一提，店內用呢款辣椒油，超正，夠辣又香！小店收四半，食到三點尾已經無客了，環顧下店內，坐位都唔算少，仲有啲向牆位，自私食都幾好吖。