添好運點心專門店 (Closed)

幾天前就約定朋友到北角鳳城飲早茶，食返個傳統灌湯餃，點知去到原來疫情關係暫停營業。在OpenRice 搜尋一番，發現附近有間添好運， 應該剛好開門，咁啱友人竟然未食過添好運任何分別，就捉咗佢過嚟食呢間米之蓮點心店。舖頭剛開門，人不多，坐下要了壺壽眉，茶就一般般啦，冇咩香味，幾蚊雞（$4位）茶錢唔預有咩靚茶葉，始終，重點係佢嘅點心。兩個人叫咗6個點心：蝦餃，燒賣，豬膶腸粉，糯米雞食得出啲點心係師傅親手做唔係交貨果啲質數。我最鍾意食佢個燒賣（$30）蝦同豬肉嘅比例啱啱好。豬潤腸粉（$25）腸粉皮好滑，不過略嫌豬膶切得太細啦，仲好少，有啲孤寒，其實豬潤都唔係貴野吖。蝦餃（$30）皮薄，唔會一夾就跌粒肉餡出嚟，餡就啖啖都係蝦。糯米雞，正常但冇驚喜，唔太大隻，有雞肉臘腸等，糯米軟棉棉。成口油孖寶：排骨（$17）同鮮蝦腐皮卷（$30）～排骨好肥，粒粒都肥，又細細粒，成口油，要記住下次唔會再叫。～鮮蝦腐皮卷上枱熱辣辣，原本應該好食嘅，因為好足料，可惜師傅炸得唔好，好油，應該係炸完冇迫返啲油出嚟，又係成口油。免加一，兩個人埋單$170 ，環境係小店摺枱feel，唔算平，但點心質素中上，比好多酒樓都好食