牛牛台式鴛鴦火鍋

Open Now

Now Closed

眾所周知，旺角嘅創興廣場一直都有好多食肆。地下條龍晚晚都排到出街邊。創興廣場除咗放題，火鍋店都不少。今次係第一次幫襯牛牛台式鴛鴦火鍋，去之前都略略睇過openrice啲食評同有咩食。見到自助區嘅火鍋料同雪糕好似都唔少，加上價錢唔係好貴，200有找，就算我唔係火鍋迷都想去試。湯底方面，印象中有揀到馬拉沙嗲鍋，另一個應該係臭臭鍋湯底。不過其實食落口都無咩分別，味道唔太濃。至於火鍋配料方面，雖然都係大路款式，但丸類都有唔少選擇，亦有鮮雞件選擇。另外有韓式年糕，不過煮一陣好快就會爛哂。落單點火鍋配料方面，我地除咗叫牛小排、安格斯黑牛個類，仲叫咗啲海鮮，例如蜆。牛肉就無咩特別，都係唔太厚身，唔太大塊。蜆算正常，唔會點食到沙，但蜆肉有啲細。令我最驚喜嘅係飲品有乳酪百香果冰沙，呢個真係第一次試嘅飲品。本身自己對百香果無咩興趣，但混合百香果，味道又出奇地夾。入口清涼，酸甜度適中，搞到我忍唔住飲完又飲。反而dryer's啲雪糕就無咩特別，普通味道，同埋有點硬，好難整。