夫人法式甜品店 (Closed)

好耐無去過深水埗西九龍中心，聽講呢頭有間好厲害既沾麵，所以就特登去試下，食完麵想食下甜品，所以去左foodcourt睇下。見到哩個小店門面貼滿宣傳既甜品照片，見到有兩個人買緊嘢好似幾okay，所以就跟著排隊順便八卦其他人食咩。排我前面嘅小姐指住隔籬張相話要法式楓糖牛角布甸（$38)，所以到我既時侯我就照叫哩個。老闆仲話哩個甜品啱啱焗起，所以唔洗等！老闆好興奮咁響我介紹佢自己既資歷，好似喺係高級酒店工作過，所以d甜品都係酒店級既，同其他店賣既唔同。佢仲插左支花俾我影相靚d喎。😂一坐低即刻食，食落熱辣辣配雪糕真係好正，個牛角布甸口感俾普通麵包布甸好好多，牛角包裡面既層次令佢個包不致於過濕。連平時對甜品一般既老公都話幾特別幾好食（可能因為個醬係雲尼拿，佢特別鍾意vanilla）。哩個咁特別，所以諗住叫多個甜品試下，由於已經飽飽地，所以叫左朱古力蛋糕，店主仲好好送左杯玫瑰花茶俾我。店主千叮萬囑我擺一擺個蛋糕先食，因為之前係雪住，會硬身d。可惜我等唔切，食咗先講，老實講哩個蛋糕好普通，唔係我預期咁濃咁滑。如果你有機會去試下，都係叫法式牛角布甸啦！