岱民利東店

Open Now

Now Closed

岱民利東店位於利東商場入面嘅最角落位置，我當日去到係正午嘅時間，好多人排隊買飯盒，我同時梗係第一時間睇吓究竟有啲咩嘢小菜先……我從透明櫥窗望埋去，我睇到都有唔少靚餸，炸雞中翼、椒鹽豬扒、南乳炆豬手、涼瓜炒牛肉、炒蓮藕片、炆豬腩肉、咖喱雞、豉汁蒸倉魚、紅燒豆腐、南瓜、炒菜心、咕嚕肉、滷水雞肶、咸蛋蒸肉餅、豆卜蒸豬腩片及粟米斑腩等等。岱民有樣嘢好，就係如果買兩餸飯，其中一款揀雞肶都只係當一個餸，呢樣係優勝條件，因為我曾經試過去一啲餐廳買兩餸小菜飯盒，如果其中一個餸揀雞肶或所有扒類就已經當兩餸，所以岱民真係好另類好～講番食物方面，咸蛋蒸肉餅好厚身，質感相當軟綿兼滑，真係入口即溶，就算連冇牙嘅人都可以輕易食到，涼瓜牛肉係新鮮炒出，真正翠綠色，牛肉都好滑溜，至於豆卜蒸豬腩片，食到好香嘅蝦醬味，豬腩片切得夠薄面又帶有少少肥膏，非常香口，飯粒軟硬適中，整體好滿意。都係嗰句～兩餸飯$25蚊、3餸飯$30蚊、淨餸$35蚊(可雙拼)，汽水、紙包飲品或例湯需另外加錢，價錢介乎加$3～$5蚊不等。