LM Cafe (Closed)

今明兩日都要去觀塘做野，所以預先上Openrice搵定喺邊食晚餐。今晚就隨意地揀咗LM Cafe，依間餐廳雖然位於觀塘工廠區內，但8點半去到都滿哂座。我同Mr.J被安排坐喺中間嘅高枱，舒適度比想像中高，至少張椅喺闊同有椅背嘅。今晚食咗1)黑松露薯條(2)鐵板爵士西冷配香草腸(黑椒汁)(3)芝士汁雞扒焗意粉黑松露薯條嚟到嘅時候係熱辣辣，份量好多，足夠3至4人食，薯條係幼薯條，伴隨薯條嘅有黑松露醬同茄汁，黑松露醬ok嘅，都有黑松露未，但味覺上爭少少先滿足，可能因為個醬係用沙律醬做底，所以甜咗少少。我個芝士汁雞扒焗意粉係即焗嘅，要攤一陣先食到。雞扒預先切開幾件，方便食客進食，件雞扒應該煎過先再焗，但仍然保持肉質嫩滑，好好味。芝士汁啱啱好足夠撈意粉，意粉都唔錯㗎，唔係淋pei pei。Mr.J係食肉獸，所以佢揀鐵板爵士西冷配香草腸(黑椒汁)，份量好多而且好熱，西冷肉質不靭有肉汁，香草腸有一大條，配菜有一片厚切蕃茄同幾棵西蘭花，平衡返食咁多肉嘅胃口，至於配搭嘅粗薯條都幾好食。食完鐵板Mr.J表示好滿足好滿意。