豪隍點心工房

Open Now

Now Closed

聽講呢間點心店非常好味，今日終於試到，因為朋友話呢間地舖分店味道同總店差唔多，不過就好坐啲，所以就揀咗呢一間。佢有個點心拼盤，入面有兩粒蝦餃、兩粒潮州粉果，一個叉燒包同埋一個流沙奶皇包，一次過滿足四個願望所以叫咗，另外仲叫咗個是日燉湯，今日係鮑魚螺頭燉雞，另外叫咗鵝肝醬鹹水角同埋鮮蝦腐皮卷。先講蝦餃，雖然入邊隻蝦唔算大，不過木柵都有一隻半至兩隻，脹卜卜好大粒，蝦餃皮好薄，果然係招牌蝦餃。潮州粉果入面啲餡好新鮮，尤其是啲沙葛「索索」聲，不過我覺得佢個皮太薄，所以好易穿搞到啲餡跌晒出嚟。叉燒包同埋流沙包就冇乜特別。個燉湯都唔錯，好似冇乜油，不過湯渣就少啲，而且鮑魚同埋攞頭都好細粒。鵝肝醬鹹水角同埋鮮蝦腐皮卷就係幾樣嘢之中最精彩。好多時候出面食到嘅鹹水角多係室溫甚至乎凍凍地，所以味道一定唔好，不過呢度嘅鹹水角好熱，值得一讚。入面加咗鵝肝醬就令到啲餡料更滋味。鮮蝦腐皮卷嘅蝦都算新鮮，另外佢個腐皮煎到好香脆，而且佢本身都夠薄，所以食落去口感好好。我最欣賞佢兩款炸嘅點心都冇乜油，實在難得。