京都薈 (Closed)

父親節特意帶爸爸去「飲啖茶，食個包」，好難得可以一家齊人飲茶。正日慶祝都預左要比貴啲，平日做嘅特價點心優惠同套餐當日都暫停，所以我哋就散叫點心同粉麵。一家四口總共叫了8樣點心和一碟上湯大蝦伊麵，雖然當日茶樓好多人但上菜都算快，等左一陣就出左三、四個點心，唔使餓住肚仔等野食。燒賣入口彈牙，嚼勁十足，豬肉香之餘蝦都有鮮味。雞札大大件好抵食，入面包住滑雞柳、蟹柳同魚肚等。最好味喺魚肚，吸收了其他餡料的精華，食落口感爽口美味。細個同屋企人飲茶好鐘意食灌湯餃，所以今次特意再叫嚟食，不過佢嘅湯底好一般，味道單調同埋裏面餡料唔多，有點兒失望。牛肉腸粉皮薄滑溜，包住裏面嘅牛肉都算足料，不過不失。四人食到捧腹離開，埋單約500幾蚊，雖然同樣嘅食物比平時賣得貴啲，但一家人食得咁開心都值得。