富東閣海鮮酒家

Open Now

Now Closed

知道佢重開後，心思思又想食片皮鴨。既然冇晚市堂食，咁咪食中午囉，仲可以食埋下午茶點心，一舉兩得。片皮鴨（$178），鴨保持水準，皮脆冇肥膏又有肉；餅皮轉咗，薄咗細咗（冇得一開二😂，之前又大又厚），而且好衛生，每塊餅皮都用蒸紙隔一隔，方便拎，唔使用手上下兩塊皮搣開，抵讚。二食，七彩炒鴨絲（+$30），大大碟，超抵食。不論鴨肉、蒜芯、韭黃、芽菜、大蔥，都超多。有鑊氣，又夠惹味，啱哂鐘意濃味嘅我。（最後當然食唔哂，+$2要個外賣盒打包）原籠馬拉糕（$21），即蒸的確唔同啲，熱辣辣不在話下，最掂係冇倒汗水，整個都好乾身。搣開即刻聞到椰香味，咬落鬆軟，好耐冇食過咁高質嘅馬拉糕。香煎蔥油餅（$17），同樣即煎，外面微脆，裡面軟淋，淡淡香蔥咸味，好食。蟹籽燒賣皇（$21），又係即蒸，大大粒，味道正常。PS：下午茶茶芥$8@，另收加一。