龍鳳冰室 (Closed)

今日年初三，入到大坑，諗住醫吓肚，點知行暈浣紗街附近一帶，得呢間餐廰有開，無選擇下，等咗10分鐘後坐低，再等5分鐘先有人執枱，員工無乜意識幫你落單，你舉手示意，佢眼尾都唔望吓你，再等3、4分鐘先幫你落單。最終，自己就叫咗個菠蘿火腿扒意粉，朋友就叫個招牌特餐，先講菠蘿火腿扒飯，嚟到，見到三片厚火腿，一堆炒疍，一堆粟米，一堆蕃茄醬，『個別』擺放喺一堆烚熟咗嘅意粉上面，好明顯所有配料一早分開煮定晒，然後照單執藥，執咗碟意粉出嚟，不過最好笑嘅係菠蘿火腿扒意粉，係無菠蘿嘅，想問點解，但係搵唔到人啋你，至於味道，同啲屋村、學校附近啲平價快餐店無乜分別。再講招牌常餐，半片奶油多士 + 千層炒疍 + 火腿雞翼湯意粉，多士凍嘅，炒疍睇唔出係一層層，不過就炒得幾好，唔會太熟，好juicy，火腿無特別，雞翼就瘦「蜢蜢」，鹵得太耐，有食柴皮感覺，心想，呢份嘢叫「招牌」，咁其它食品就唔駛試嘞。最後，叫兩杯熱奶茶，可惜嚟到係暖嘅，一啲都唔熱，飮半杯，放棄。埋單，新春其間，加二收費，共銀$110，跟朋友同一感覺，無下次。