花香 (Closed)

聖誕佳節就到，肯定要搵啲美食慶祝吓。 就等我揀間特色啲嘅餐廳，食個聖誕大餐，同朋友同樂一番！👏👏餐廳就喺K11購物藝術館B2樓，粉紅色嘅一角，少女心出晒嚟。 餐廳名叫花香，食物大部份都用食用花點綴，又靚又吸睛，全部都要影相打卡呀！ 前菜嚟喇，分別有涼拌黑松露紋甲墨魚，墨魚切得粒粒方正，食落爽口，帶點煙韌，清甜好味；另外嘅皮蛋豆腐，好有fusion感覺，外貎似西餐，食落又似中菜。鮮黃色花下面，原來係肉鬆、紫薑、皮蛋同豆腐嘅結合！栗子湯啡黃，用特式湯杯盛放，有濃郁嘅栗子香味，可惜太細杯。主菜我哋分別叫咗海膽雪人米型意粉同華麗大蝦墨汁意粉。 金黃嘅海膽配上一粒粒嘅米型意粉，意粉口感特別，吸收晒海膽醬汁嘅鮮香，加上雪人點綴，夠哂特色。 唔講唔知，雪人係海膽芝士嚟架，唔係雪糕球，好有趣； 大蝦意粉嘅蝦新鮮入味，似平時食到嘅凍蝦，配上黑色嘅墨魚汁意粉，呢個組合好特別！兩個意粉都做得非常有創意！甜品係草莓鮮奶厚吐司，惹人垂涎欲滴，白色乳酪鋪上鮮紅色嘅士多啤梨，都有啲聖誕色彩！飲品蜜桃烏龍茶，生津解渴，亦能消消滯。 另一杯係黑糖薑汁牛奶，飲落甜中帶點薑汁微辣，夠醒神，再配上懸浮嘅聖誕老人棉花糖，好得意