狀元麵館 (Closed)

呢日夜晚去睇張學友演唱會，夜晚男友來接我，順便喺狀元食飯。狀元係我其中一間午餐愛去之處，來呢度食過不下十次。呢度啲叻沙好好味，雖然唔係地道星加坡叻沙，但港式得來好啱我胃口，而多款飯品又都味道唔錯。而呢度唔係普通茶餐廳，又可能唔算太多人知道，所以無論午餐／晚餐，都唔算嘈，又唔會太逼太多人，可以舒舒服服坐低食飯。是日餐單：狀元叻沙，$37－－齋飽片（雖然係齋，但甜甜哋，幾好味）、魚旦片（都好爽口）＆雞絲，叻沙湯底辣辣哋，好醒胃，辣度啱好辣的我；凍檸檳，$5：大大杯，夠晒lemon，夠晒凍，中午至6點半加$5就有，我哋啱啱６點半到，所以都enjoy到；海南雞飯，$40，包一杯飲品／菜湯－－我哋叫咗菜湯，湯底都好鮮甜，可以當湯飲，主菜海南雞去晒骨咁滯，又滑，味道又好，油飯都好好味，而咁多海南雞飯來講，佢都算最好味嗰啲，我其他朋友都好捧場。特別之處呢樣係隔離味皇攞過來，因為係同一集團；雞翼，$2x－－雞翼好似係柚子雞翼，甜甜酸酸得來陣味怪怪哋，no good。