Noodle LAH! (Closed)

夜麻麻喺金鐘都冇咩食，黎到遠東叫做有幾間餐廳。呢間之前試過都幾好食，所以再試多次。夜晚冇咩人，座位非常寬敞，暗淡嘅燈光令到呢度嘅環境有幾分浪漫，最適合啲情侶撐枱腳。我點左大鑊炒貴刁，好香。有蝦、豆腐，仲有啲蛋碎。唔係太油膩，份量適中，賣相都吸引。不嬲都鍾意食豉油炒貴刁多過星洲炒貴刁，好似冇咁多人造色素。朋友點左泰式金邊粉，份量俾貴刁多小小，爽身，唔算太鹹。正如朋友話齋，試食金邊粉真係可以試到一間餐廳嘅水準。呢隻金邊粉冇令到我個朋友失望。餐廳嘅款式都幾多，有撈面、湯面、粉面，仲有飯類，都係泰國餐廳平時食開嗰啲嘢食。另外仲有頭盤、小食，食物唔包嘢飲，但係如果點頭盤加主菜就會送一杯野飲（好似）。平均埋單一個人＄80到啦。正常嘅份量，環境係呢間餐廳嘅賣點，食物都滿意，唔知平日使唔使等位，但係夜晚就可以一試。