Coffee Talks (Closed)

放假出左旺角行街，行足全日勁攰，好友貼心BOOK左呢間Coffee Talks食晚餐，環境寬敞舒適，比人感覺好悠閒。黑松露雜菌意粉菇菌香氣濃郁好鮮甜，意粉炒得乾身夠哂彈牙，珍貴黑松露香氣撲鼻，簡單健康又惹味，正。特級牛肉漢堡配炸薯條厚切漢堡肉味濃郁，咬落肉汁滿瀉，配料豐富，有齊蕃茄、煙肉、生菜、芝士等，漢堡包微微烘過口感香脆又鬆軟。薯條炸至金黃色，外酥內脆，口感一流。惠顧主菜可享加配小食優惠，價錢相宜都幾抵。柚子雞翼一碟三隻份量剛好，柚子味酸酸甜甜好開胃，雞翼鮮嫩又多汁。特色蛋糕是日精選為焦糖芝士蛋糕，口感細滑Creamy，芝士味道相當香濃，甜而不膩，唔錯。